Kumbre BES Febrüari 2026

E Kumbre BES ta sigui ta un plataforma pa e islanan diskutí, kooperá i sostené otro, i ta keda guiá pa un MOU firma pa tur 3 isla. E meta di Kumbre BES ta pa mehorá kondishonnan riba e islanan i pa enfrentá desafionan komun na un manera efisiente i produktivo, miéntras ta probechá di forsa i kapasidat konhunto.

E Kumbre BES akí a enfoká riba fortifikashon di kuadronan di gobernashon, deliniá enfokenan legislativo, i pone atenshon na prioridatnan urgente. E miembronan di e Konseho Insularnan a enfatisá e importansia di un base legal pa garantisá ku e representantenan di pueblo ta keda kompletamente inkluí den konsultanan, prosesonan di toma di desishon i akshonnan ku ta kuadra ku e kuadronan konstitushonal i atministrativo ku ta goberná e islanan BES. E kompromiso pa kontinuá ku kooperashon riba ehekushon di klaridat i logra inklusividat struktural a keda firmemente afirmá pa tur isla.

Den tratamentu mas amplio di WolBES/FinBES, e konsehalnan a bai di akuerdo pa sigui traha huntu riba prioridatnan kompartí, miéntras nan ta rekonosé ku sierto tópikonan ta reflehá preferensianan lokal diferente. E asuntunan akí lo keda revisá individualmente, permitiendo kada isla pa sigui e enfokenan ku ta mas apropiá pa su sirkunstansianan spesífiko miéntras ta mantené un kuadro di kooperashon.

E progreso relashoná ku representashon legal di e islanan BES na Den Haag ta kontinuá. Durante e Kumbre BES, e miembronan invitá di Kolegio Ehekutivo di dos di e islanan a indiká e progreso hasí riba desaroyo di vários proposishon. A hasi akuerdonan pa kompartí informashon entre e Konseho Insularnan pa revishon i pa presentá un proposishon final i un strategia di implementashon den un próksimo reunion. E tópiko akí ta keda ku prioridat haltu pa e islanan i, en konekshon ku esei, un planifikashon i kumplimentu estrikto a keda ekspresá i konfirmá.

E Kumbre BES a trata tambe diferente proseso legislativo i konsultanan andando relashoná ku legislashon BES, inkluyendo e Lei di Partidonan Polítiko (WPP) i e proseso di konsulta habrí tokante areglo temporal di desempleo (UWV) pa siudadanonan di e islanan BES. A hasi akuerdonan di kooperashon pa evaluá e posishon individual di kada isla riba e proposishon legislativo akí, despues di kual lo formulá un opinion kolektivo pa garantisá ku e posishon final ta reflehá tantu interesnan kompartí komo realidatnan lokal.

Salubridat ta keda un di e prioridatnan mas haltu pa e islanan BES. Miéntras vários inisiativa ta andando pa purba mehorá servisionan, e representantenan di e islanan a bai di akuerdo riba e nesesidat pa desaroyá un strategia kolektivo pa mehorashon sustenibel. Un komishon chikitu lo investigá i presentá su resultadonan i proposishonnan promé ku e próksimo Kumbre BES, lokual lo permití kada isla formulá su posishon i partisipá den un diskushon informá den e siguiente reunion.

E estado di edukashon na e islanan BES a keda diskutí ku urgensia i preokupashon. Maske kada isla ta enfrentá desafionan distinto den su sistema di edukashon, e representantenan a ekspresá nan mal kontentu ku kondishonnan aktual i e difikultat pa logra progreso ku e departamentonan responsabel na Den Haag. E miembronan a enfatisá e kaida preokupante den resultadonan edukativo i e responsabilidat pa protehá futuro di e hubentut di e islanan. Representantenan a enfatisá e nesesidat pa kooperashon mas fuerte, responsabilisashon i akshon dirigí pa atendé e desafionan akí.

E representantenan di e islanan a trese dilanti un proposishon ku a ser lansá durante un enkuentro resientemente na Hulanda. Kual ta envolví e seis islanan di e eks-Antia Hulandes pa eksplorá kooperashon renobá. Representantenan di e islanan BES a diskutí e nesesidatnan i e posibilidatnan. Lo renunda ku e otro islanan pa eksplorá e inisiativa akí mas, tabata e resultado di e punto aki.

Na klousura di e Kumbre, representantenan di e islanan a para ketu i a diskutí e tópiko di obligashon di servisio públiko (PSO) pa garantisá konektividat entre e islanan. Ta un punto di preokupashon kresiente; ku e atenshon pa e PSO akí ta asina minimalisá na Den Haag, lagando e responsabilidat pa splika e nesesidat i benefisionan di un mihó konektividat puramente den man di e islanan i otro koleganan karibense. Lo bolbe hasi intentonan pa priorisá i atendé e tópiko akí debidamente.

E Kumbre BES a afirmá e kompromiso di Boneiru, Sint Eustatius i Saba pa traha den kolaborashon miéntras ta respetá outonomia lokal. Pa medio di revishon legal, partisipashon legislativo koordiná i un enfoke renobá riba salubridat, edukashon, representashon i otro áreanan di interes komun, e islanan tin komo meta pa avansá desaroyo sustenibel i mehorá e kalidat di bida pa nan respektivo komunidatnan lokal.