Kredu di Papiamentu resitá pa promé biaha den Konseho Insular
Na apertura di e reunion di Konseho Insular di Boneiru awe, 27 di òktober 2026, a resitá e Kredu di Papiamentu pa promé biaha. E kredu ta un promesa pa defendé nos idioma, papi’é bon i yuda otronan siñ’é.
Pa mustra respèt pa e kredu, e presentenan a lanta para pa e momento aki, ku ta duna ehekushon na moshon D147156 di 22 di sèptèmber 2026. Asina, e kredu ta haña un lugá fiho na apertura di e reunionnan di Konseho Insular.
Amor pa Papiamentu ta wordu mustrá tambe den loke nos ta hasi tur dia. Pesei, Konseho Insular di Boneiru ta kontentu ku e ehekushon di e moshon aki i ta spera ku e paso aki ta motivá nos pueblo pa sigui hasi bon uso di nos idioma.