E promé dia di e kumbre di islanan BES komo señal pa un kooperashon di aliansa entre Boneiru, Sint Eustatius i Saba ta tras di lomba. Djamars 16 yanüari 2024 tabata e promé dia di e kumbre entre islanan BES pa yega na un akuerdo i posishon komun tokante e revishon di WolBES/FinBES. E kumbre a konta ku presensia di miembronan di Konseho Insular di tur tres isla, diputado di Sint Eustatius i Boneiru, Sekretario Insular di Boneiru i Sint Eustatius i tambe diferente konsehero di diferente spesialisashon ku ta asistí e islanan den e proseso aki.

Durante e siman di e kumbre lo trata un konsepto di akuerdo ku ta riba mesa, e meta ta pa promé ku fin di siman yega na un aliansa di kooperashon signifikativo entre e islanan.

E promé punto riba agènda ta e revishon di e konsepto di kooperashon. E islanan e kompartí diferente adaptashon ku nan ke mira den e dokumento di e akuerdo aki. Tambe e islanan a ekspresá desafionan ku nan ta enfrentá pa ku e desishon di sera un akuerdo pa atendé puntonan ku ta trata bienestar di tur tres isla.

E dokumento den konsepto ku ta den revishon durante e kumbre a keda formulá konhuntamente pa profesor Arjen de Rijn, abogado i profesor di lei konstitushonal di Caribe; Arjen de Wolff, Grefi interino i spesialista di relashonnan den reino; i un tim di konsehero spesialisá bou di liderato di Christopher Frans i Roxanne Francees, Sekretario insular di e isla respektivamente Sekretario Interino di e isla.

 "Mi ta sumamente kontentu ku nos ta trahando duru riba un mekanismo di koordinashon permanente. Mi tin tur speransa ku nos ta bai logra", Segun lider di e delegashon di Boneiru Konsehal Desiree Coffie. Por mira bek na un bon komienso pa loke ta trata e kumbre.

 Djárason 17 di yanüari lo trata e revishon di e WolBES/FinBES. Pa e revishon aki tambe Boneiru a formulá un asina yamá “Whitepaper”ku ta indiká e posishon di Boneiru pa ku e revishon aki. Esaki a sosodé ku sosten di e konsehero di Boneiru kual ta profesor Arjen van Rijn.